១. អនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទក្នុងមាត្រា ៥ ចែងថា «កិច្ចការក្នុងគ្រួសារ និងការអប់រំចិញ្ចឹមបីបាច់ថែរក្សាកូនជាភារកិច្ចរបស់បុរសនារី»។
ខ្លឹមសារនេះបង្ហាញគោលការណ៍ស្តីពីការគោរពចំពោះភាពថ្លៃថ្នូររបស់បុរសស្ត្រីក្នុងជីវភាពសង្គមសេដ្ឋកិច្ច និងភាពរុងរឿងរបស់សង្គមនិងគ្រួសារ។ ដូច្នេះរវាងឪពុកម្តាយ ស្វាមីនិងភរិយា បុរសស្ត្រីមានភារកិច្ចរួមគ្នាដោយគ្មានការរើសអើង ប្រកាន់តួនាទី ក្នុងការបំពេញកិច្ចការក្នុងគ្រួសារនិងការអប់រំចិញ្ចឹមបីបាច់ថែរក្សាកូន។
ភារកិច្ចមានដូចតទៅ៖ • ផ្តល់កំណើតនិងរក្សាជីវិតកូន • ស្វែងរកទ្រព្យដើម្បីផ្គត់ផ្គង់ជីវភាពគ្រួសារ • គ្រប់គ្រង និងរក្សាសុវត្ថិភាពក្នុងគ្រួសារនិងជៀសវៀងអំពើហិង្សា • បញ្ជូនកូនទៅសាលារៀនឱ្យទទួលបានការអប់រំ និងបណ្តុះបណ្តាលកូនឱ្យក្លាយជាពលរដ្ឋល្អ មានជំនាញវិជ្ជាជីវៈ • ផ្តល់គំរូល្អដល់កូនក្នុងការអប់រំសុជីវធម៌ សីលធម៌ គោរពច្បាប់សង្គម និងការជួយចែករំលែកកិច្ចការផ្ទះទៅវិញទៅមក • អប់រំកូនឱ្យថែរក្សាប្រពៃណី ទំនៀមទម្លាប់ វប្បធម៌ឱ្យគង់វង្ស • បីបាច់ថែរក្សាកូនប្រកបដោយព្រហ្មវិហារធម៌ • ថែរក្សា និងលើកកម្ពស់សុខភាពផ្លូវកាយ ផ្លូវចិត្ត និងផ្លូវបញ្ញាស្មារតីរបស់កូន • ជំរុញ និងលើកទឹកចិត្តចំពោះភាពតស៊ូ ព្យាយាមរបស់កូន • ផ្តល់សិទ្ធសេរីភាពដល់កូនក្នុងការធ្វើសេចក្តីសម្រេចចិត្តទាក់ទងនឹងការរៀបចំអនាគតរបស់គេមានការជ្រើសរើសមុខវិជ្ជា មុខរបរ គូស្រករជាដើម • ចែកមរតកដល់កូនទៅតាមលទ្ធភាពនៅពេលកូនបែកចេញមានគ្រួសារ។
ឧទាហរណ៍៖ ឪពុកម្តាយផ្តល់កំណើតឱ្យកូន ផ្តល់ឈ្មោះឱ្យកូន ត្រូវរួមគ្នាដោយគ្មានការរើសអើងក្នុងការផ្តល់ចំណីអាហារតាមតម្រូវការយកកូនទៅសាលារៀន ព្យាបាលពេលកូនឈឺ រៀបចំកូនឱ្យមានមុខរបរ ផ្សំផ្គុំកូនឱ្យមានគូស្រករ។
ចម្លើយនេះជាចំណេះដឹងទូទៅ ហើយមិនមានប្រភពដែលបានចុះបញ្ជីទេ។
