វិញ្ញាសា វប្បធម៌ទូទៅ (ប្រឡងជ្រើសរើសគ្រូ បរិញ្ញា+១) សម័យប្រឡង៖ ២០០២

ចម្លើយសំណួរទី១

ក). វប្បធម៌បរទេសជះឥទ្ធិពលមកលើយុវជនខ្មែរគឺ៖

• តន្ត្រីញ័រញាក់ខុសពីលក្ខណៈជាតិខ្មែរ
• ភាពយន្តអាសអាភាស កាប់សម្លាប់ ឆក់ប្លន់ ល្បិចកលខ្មៅងងឹត
• សំលៀកបំពាក់ស៊ីវិល័យហួសហេតុហូរពីបរទេស
• ម៉ូតសក់ ឬកពារកិរិយាមាយាទ ចាប់ដៃ ញាក់ចិញ្ចើមលើកដៃដំណើរលោត
• អត្តចរិកទំនៀមទម្លាប់ប្រពៃណី និងឥរិយាបទ ដេក ដើរ អង្គុយ ឈរ ប្រាសចាកនឹងចរិកលក្ខណៈរបស់ជាតិខ្មែរ
• សម្ភារប្រើប្រាស់ច្រើនតែបរទេសនិយម មិនសូវចូលចិត្តប្រើប្រាស់នូវរបស់អ្វីដែលជារបស់ជាតិខ្លួន។

ខ. ក្នុងនាមជាបុគ្គលិកសិក្សាមួយរូប ខ្ញុំមានវិធានការទប់ស្កាត់វប្បធម៌ពាលាអាវាសែទាំងនោះដូចតទៅ៖

• បណ្តុះស្មារតីស្រលាញ់សិល្បៈ វប្បធម៌ជាតិឱ្យចូលជ្រៅក្នុងស្រទាប់យុវជន
• ផ្សព្វផ្សាយសិល្បៈវប្បធម៌ជាតិឱ្យបានច្រើន ជាងការផ្សព្វផ្សាយវប្បធម៌បរទេស នៅគ្រឹះស្ថានសិក្សានានា និងទៅទីសាធារណៈ
• ទប់ស្កាត់រាល់វប្បធម៌បរទេសណាដែលមិនផ្ដល់ផលប្រយោជន៍ដល់សង្គមជាតិខ្មែរ
• អប់រំសីលធម៌ទាំងប្រាំ (សីលធម៌ផ្ទាល់ខ្លួន គ្រួសារ សង្គម វិជ្ជាជីវៈ និងអន្តរជាតិ)

ចម្លើយសំណួរទី២

ក). បានជាខ្ញុំជ្រើសរើសមុខរបរវិជ្ជាជីវៈគ្រូបង្រៀនព្រោះ៖

• គ្រូបង្រៀនជាមុខរបរមួយថ្លៃថ្នូរ ឧត្តុងឧត្តមហើយមានគុណប្រយោជន៍ចំពោះជាតិ មាតុភូមិ ក្នុងការបណ្តុះបណ្តាលធនធានមនុស្សដើម្បីអភិវឌ្ឍ។


• គ្រូបង្រៀនជាវិស្វករនៃព្រលឹង ជាបុព្វការីជន និងជាអ្នកកសាងសតិបញ្ញារបស់ជាតិ។

ខ). គរុនិស្សិត មកពីពាក្យ (គរុ + និស្សិត)៖

• គរុ = គ្រូ ឬ គំរូ


• និស្សិត = គឺជាអ្នករៀនដែលស្ថិតនៅក្រោមការគ្រប់គ្រងរបស់គ្រូ ហើយជាអ្នកដែលមានកម្រិតយល់ដឹងខ្ពស់។


• គរុនិស្សិត គឺជាអ្នករៀនផ្នែកគរុកោសល្យ ជាអ្នកវិជ្ជាជីវៈផ្នែកខាងគ្រូបង្រៀន។

គ). រយៈពេលបណ្តុះបណ្តាលនៅមហាវិទ្យាល័យគរុកោសល្យយើងត្រូវប្រកាន់អាកប្បកិរិយាដូចតទៅ៖

• យកចិត្តទុកដាក់គោរពវិន័យ និងបទបញ្ជារបស់មហាវិទ្យាល័យ


• យកចិត្តទុកដាក់តាមដាន គិត សង្កេត ត្រិះរិះពិចារណាវិភាគធ្វើសំយោគ ប្រៀបធៀបលើប្រធានបទនីមួយៗ


• ខិតខំសិក្សា និងស្វ័យសិក្សាស្រាវជ្រាវដើម្បីក្លាយជាគរុនិស្សិតល្អ និងជាគ្រូបង្រៀនដ៏ល្អនៅពេលអនាគត។